閱報得悉，北角書局街嘅王記糖水，原來由「初十一啟市」變成「租約期滿結束營業」，咪誤會勝曉嵐淨係識得寫食嘢，只係呢單嘢，再次印證，香港地，諗住自強不息搞檔小生意呢一套已經唔work，因為無論你幾叻，最後都係俾啲「業主」手刃！

勝曉嵐識阿王（即係嗰個四眼佬老闆）於上世紀90年代初，嗰陣，非北角原居民嘅在下係跟個金融圈嘅uncle去幫襯嘅，阿王擺檔嘅位置，其實唔係書局街，而係新都城百貨隔離轉入去嗰條橫街（或者叫做巷）某大廈嘅「騎樓底」，因為要人哋走晒至擺得檔，所以阿王只能做晚市，佢嘅生財工具，就係大家喺書局街舖頭見到嗰架鐵皮車，而阿王就係憑佢嗰碗足料菜乾陳腎豬骨粥嚮朵嘅，在下多數係買兩碗畀父母親再配幾碗糖水畀屋企其他成員，嗰時阿王同在下講，希望努力儲錢快啲上舖，車仔檔都要排隊，在下堅信佢一定得。

咁結果真係得吖，阿王真係喺書局街落戶締造另一條人龍，嗰陣北角某財經大報嘅行家好鐘意收工去食碗豬骨粥，佢哋曾經同阿王講，啲嘢咁好食其實將來可以上市，而阿王亦都話他日上市一定會搵佢哋搞……可惜，而家莫講話上市，連檔都收埋，呢個約定，似乎好渺茫了！

勝曉嵐喺度祝願阿王快啲搵到新嘅落腳，等緊你部鐵皮車重出江湖，加油！