曾五奪「香港舞台劇獎最佳劇本」、電視劇《短暫的婚姻》的編劇莊梅岩，昨日頂住身孕，冒着動胎氣的風險，在facebook開腔點名炮轟高志森，直指他「好少人會粗鄙同低智到咁loud咁理直氣壯」。莊梅岩指已故張國榮哥哥早年在電台，亦曾開咪鬧高志森「嗱渣」。

事件源於94年，高志森想請哥哥拍《香江花月夜》，但當時哥哥屬黃百鳴旗下藝人，而且接拍了于仁泰導演的電影《新夜半歌聲》。不過高志森先下手為強，以飯局為名，寫了一張支票給哥哥，稱以示誠意。哥哥表示在飯局礙於情面，暫且收下支票，打算擇日歸還。但不久高志森就同周刊爆料，指哥哥收錢不認賬，訪問還附有一張沒有mark死線嘅「300萬支票」。他更聲稱「我有權告張國榮！但我唔想玩嘢。」

事後哥哥自然嬲到爆，在接受吳君如電台節目《娛樂性騷擾》訪問，被君如問起事發經過時，哥哥直認不諱：「你唔問我，我係唔會講。係，我係有收過張支票，但我可以話畀你聽張支票都唔係300萬添。」君如即問：「影咗相出嚟喎，但係又冇日期又冇劃名，張國榮。」張國榮聞言即反問：「如果你整張cheque畀人，你會唔會唔寫？bullshxt！」君如同時突破盲腸：「同埋你真名都唔係叫張國榮。」哥哥同時道出另一破綻：「唔係……其實件事係有一個漏洞。因為行內大家都知道，張國榮拍戲咁耐，係唔用張國榮個名去收支票嘅！咁點解要咁樣寫張假支票出嚟呃人？」他補充：「同埋，唔係話講得寸或者乜嘢，我係咪未見過一張一百萬嘅cheque先？點解要搞到單嘢咁大單先？就係話，你畀張支票我，你好想我拍呢部戲。只係話，你想show畀我睇你嘅誠意，然後我推咗好多次，我而家只係講個真相，我推咗好多次。」

「然後佢就話，『唔緊要，我只係想話畀你知我嘅誠意啫！你可以唔拍，你真係可以唔拍，你可以問咗（黃）百鳴先......』」哥哥在訪問中更提到向華強的名字：「因為我係百鳴嘅人，你打橫嚟講都唔得，係咪先？因為我唔係話乜嘢。向華強搵我拍戲，都要跟正手續。係咪先？人哋大喇啩？向華強，但點解呢啲事唔會發生喺人哋身上？而要同一個，拍咗咁多部戲嘅老友要咁樣反面啫？我覺得冇咁嘅必要反面？我個朵都好響㗎！」結尾講到多年老友高志森，哥哥語重心長的說：「我係好直嘅人。我都話囉，大不了你告囉，你講咁多Bullshxt做咩呢？你做乜講咁多嘢？佢作為一個已經有仔有女嘅人，我就冇啦，你作為一個有仔有女嘅人，唔該你就正正經經做番啲嘢啦。大佬，已經出嚟做嘢咁耐，已經做咗咁多部戲嘅導演，點解要咁嗱喳？」