榮升老竇嘅民主黨立法會議員涂謹申，今個新年特別忙，因為要帶囝囝信之四出𢭃利是。信之就嚟三個月大，涂太阿Sue笑笑口話信之與眾不同，因為信之嘅頭圍遠超一般水平，係大頭B一名；八方聽聞大頭仔特別聰明，係真係假要等信之大個仔先知，但肯定信之非常「孝順」，因為佢唔會半夜三更喊住人抱，令阿涂兩公婆晚晚有覺好瞓。
阿Sue自爆呢幾日抱信之出四拜年時，一袋兩袋好似走難咁款，噚日發現瘦咗一磅，簡直係另類減肥大法。
阿涂家全副心機擺喺囝囝身上，樂得做政界湊仔公。咁嚟緊立法會選舉會唔會轉戰角逐超級議席呢？佢笑笑口話擔心自己分身不暇，因為到時信之都係得嗰幾個月大㗎咋，換言之去馬機會極微，睇嚟選超級議席呢啲重任，都係留番畀主席何俊仁適合啲。