【薑係老嘅辣】秦沛相隔23年再爭最佳男配 金燕玲女配角復仇戰
林雪最佳男配角最佳女配角曾志偉第53屆金馬獎
港產片真係唔惹小,第53屆金馬獎今晚宣佈咗入圍名單,總共有8套港產片入圍,證明港產片仲好有質素。
有能力問鼎獎座嘅唔只港產片,仲有三位好好戲嘅男演員爭「最佳男配角」,先講番入圍名單,分別係《北京遇上西雅圖之不二情書》嘅秦沛、《一路順風》嘅納豆、《六弄咖啡館》嘅林柏宏、《一念無明》嘅曾志偉同《老笠》嘅林雪。秦沛86年憑住《癲佬正傳》已經贏過呢個獎一次,另外93年《新不了情》都有提名,但就贏唔到;而香港影帝曾志偉喺97年憑《愈快樂愈墮落》做過金馬最佳男配角;林雪就未贏過,但都試過兩次提名。
最佳女配角方面,上年喺同一個獎落選嘅金燕玲,今年繼續努力,憑《一念無明》再次角逐最佳女配角,其他提名仲有《北京遇上西雅圖之不二情書》嘅吳彥姝、《一句頂一萬句》嘅劉蓓、《樓下的房客》嘅李杏同《德布西森林》嘅陸弈靜。