立法會九龍西補選原民主派代表劉小麗逃不過DQ魔掌，日前選舉主任向佢發出通知書，宣佈撤銷佢嘅參選資格，但原來通知書嘅英文版內容出錯，喺12日發出嘅通知信內疑誤將劉小麗宣佈參選並重申從不支持港獨嘅日子「9月20日」寫成「10月20日」，網民揶揄選舉主任「未卜先知」，質疑通知書仲有冇效。

網民質疑通知書失效

立法會議員毛孟靜喺facebook上載選舉主任嘅通知書英文版錯誤內容，質疑選舉主任發信日係「10月12日」，信中提及考量理據就係「10月20日」。而中文版通知書則喺相關表述中註明係「9月20日」，相信選舉主任誤將小麗宣佈參選並重申唔支持港獨日子由「9月20日」誤寫成「10月20日」。
問題喺網上引發討論，網民質疑通知書係咪有效，「未發生嘅嘢何來判斷？」有人揶揄選舉主任「穿越時空」、「先知未來」、又戲稱通知書為2020年立法會改選而寫。選舉主任回覆時話知悉通知書上其中一個日期英文版本有文書錯誤，已更正並通知小麗，但冇回應有冇影響裁定有效性。