王菀之（Ivana）噚晚喺中環出席時裝活動，同場仲有徐濠縈，今次主要係撐好友黃馨嘅場，做咗人妻一段日子嘅Ivana，圍繞佢嘅話題都係離唔開生b，講到生B大計？Ivana傻笑咁話：「唔知呀，唔知點講呀！」之後再問佢會唔會豬年生豬仔，有冇話目標要幾多個？佢統統話：「我唔知喎！呢啲問題好難答，搞到成個人都係紅色。」

好耐冇喺幕前露面嘅黃馨，近年主力係發掘一啲時裝界嘅新血，除咗佢老公Alex Fung同Ivana一直有合作之外，黃馨都試過為好友嘅演唱會設計造型，話晒大家都係唱歌出身，唔知有冇關於唱歌嘅合作？黃馨話：「有諗過呀，希望同Ivana可以合作唱兒歌，佢又鍾意天真同幻想嘅嘢，而且佢遲啲都會生bb，希望香港嘅小朋友，可以睇到多啲關於香港創作嘅嘢。」唔知黃馨又有冇傳授生B貼士給Ivana？她就話：「我個仔好鍾意Ivana，只要佢一出現，好自然佢就會幫我湊B。」

精選娛聞，喺晒《娛果》
http://fb.com/appledailyent