湯家驊退出公民黨前臨別感言，話最希望愛徒、即係執業大律師楊岳橋（Alvin）接棒喺新界東補選上陣，冀愛徒保住公民黨新東議席不失，即時令Alvin人氣急升，唔少人開始留意年僅34歲嘅Alvin係乜水，當然，亦難免有唔少人抽水呃like。
人民力量成員快必譚得志噚日就喺facebook留言：「一定要我撐楊岳橋的話，只有一個理由，佢似我哋人民力量：蘇浩」，然後將蘇浩同Alvin嘅斯文look拼埋一齊，八方睇落，發覺Alvin真係同身兼人力新東立法會議員陳志全助理嘅蘇浩，人有相似喎。
八方噚日問過Alvin點睇蘇浩呢位隔籬黨嘅疑似失散兄弟？佢話：「若要人似我，除非兩個我。」但補多句：「佢靚仔、後生、活力過我。」真係好鬼謙虛㗎箒。