又一個打出頭嘅故事。

貌似黎明嘅大陸藝人吳京，出道嘅時候同甄子丹合作，拍過葉偉信導演嘅《殺破狼》飾演一名殺手。多得甄子丹提攜，令吳京可以晉身大銀幕。

吳京呢隻狼12年後載譽重來，今次憑嘅係大陸電影《戰狼II》。聽日佢就會同《戰II》嘅女主角盧靖姍嚟香港宣傳，順道會出席聽晚喺尖沙嘴海運戲院舉行嘅首映。據知吳京只會逗留一晚，後日就會飛返北京。

「狼」真係特別旺吳京，之前套《戰狼》吳京飾演嘅冷鋒，簡直就係荷李活Rambo嘅化身，不過就係打鬼佬，難怪票房收成5.45元億人民幣。今集《戰II》仲勁，打到去非洲，Rambo式嘅殺戮加上標榜大中國主義，令到一班大陸憤青自high，所以票房破盡內地華語片紀錄，上映41日累計收55.7億元人民幣，套戲目前仲喺內地上緊。而香港就會喺後日上映。