黃靜文接獲指示後深入「疫區」了解旅客訴求，有人話要乾淨衣物替換，有人要求膳食多菜少肉，亦有人想政府提供酒精飲品，齋飲清水好寡。前兩樣嘢比較易辦，飲酒卻有難度，事關隔離令由衞生署執行，該署向來唔鼓勵吸煙、飲酒，據知有醫生直指酒店係隔離中心並非度假營，旅客正接受健康觀察，所以唔贊成提供酒精飲品。
不過黃靜文認為旅客要求不過份，而且被隔離嘅旅客並非健康有問題，力撐送酒入去，況且飲酒係基本人權，如果唔畀飲酒，可能引起強烈抗議，權衡輕重後衞生署終開綠燈，八方聽聞仲獲酒商贊助㖭。事後證明呢個決定正確，否則未必會出現解封一刻嘉年華式場面。黃靜文曾任前政務司司長肥龍政務助理，今次再立一功，前程似錦也。