【萬人迷襲港】碧咸談哈七 簽下承諾與家人晚飯定必關手機
碧咸David Beckham哈七
英國萬人迷碧咸(David Beckham)從北京抵港,今日現身中環出席友邦保險記者會,佢噚日抵埗即於Instagram報告行蹤。
碧咸最近被指有脫髮危機,今次佢現身似乎已成功「施髮術」變回濃密,為配合活動嘅「健康、長久、好生活」主題,碧咸自言都有壓力嘅時候,佢慶幸可以過住自己想過嘅生活,碧咸更賣口乖,表示能夠以代言人身份參與呢次推廣感到自豪,更在台上簽定對健康人生嘅承諾,佢即場寫上:「每天微笑和與家人晚飯時要關掉手機。」是次活動上,碧咸提起四個仔女,表示幾個細路都有留意其一舉一動,7歲寶貝女哈七(Harper Seven)當練習體操時,曾留意到爸爸在玩手機,繼而會問點解只顧玩手機,碧咸立即解釋當時正同緊太太(Victoria)透過facetime視像通話。
現場有記者又問到父母有否需要管制子女玩社交平台時,碧咸自言好明白家長會擔心兒女亂咁上網交友,原來佢除咗對19歲大仔Brooklyn比較自由外,現時都有監控其餘兩名囝囝點樣利用社交網絡,但係大仔有時都會問佢意見才上載內容。
碧咸在整個發佈會上對談約25分鐘,除談與子女溝通維繫,大部份都係講飲食及生活,佢又指帶仔女返學係個挑戰,有時為佢哋準備好早餐後,自己只會食佢哋吃剩嘅口水尾,又或者食一隻蕉就算。
精選娛聞,喺晒《娛果》
http://fb.com/appledailyent