hmvod記招今晚喺金鐘萬豪酒店舉行，慶祝一周年之餘，仲宣佈會有兩套劇喺平台優先播出，一部係《向西聞記》，十三集共十個故事，記招上仲播咗其中一集——《畜牲傳心師》，即張繼聰、胡杏兒嗰套，裡面又粗口橫飛，又灑下鹽花，突破電視尺度。張繼聰更加係「舌璨蓮花」，陳意嵐甄穎珊更加有床戲呀口交呀——咁當然係借位啦。

張繼聰受訪時話：「都係一個新嘗試，係一套好生活化嘅劇，又有好多廣東話助語詞，喺網上播可以更加貼地。性愛場面都係點到即止，其實呢啲喺美劇都好普遍啫。」佢話過多幾年先俾個仔睇：「依家都係睇住卡通片先啦。」同老婆備案會有情慾場面？阿聰稱：「之前有同佢提過有個劇本，佢就話，『你都咁大個人，唔使講啦！唔使問我！』」如果太太拍呢？阿聰講明唔贊成：「可以拍動作戲，但唔可以愛情動作囉。有Kiss戲我都會支持佢嘅，最多播嗰陣我遮住自己對眼唔睇囉。」

咁平時講唔講粗口呢？阿聰就話睇場合啦，但就將個重點射咗去啲前輩度，笑言：「前輩啲助語詞講得好好笑，而且有啲說話仲難聽過粗口添。」

不得不提就係阿聰同一身戰鬥格嘅陳意嵐連場埋身肉搏，阿聰自言拍嗰陣一啲都唔浪漫，又燈光師又盛，9個男人喺度：「不過大家都好專業，而我喺床戲方面都只係一個新人啫！今次拍攝算係大膽0架喇！」

精選娛聞，喺晒《娛果》
http://fb.com/appledailyent