張家輝、郭采潔同張繼聰等，噚晚出席《陀地驅魔人》嘅首映，導演兼主角嘅張家輝就身穿西裝出席，官仔骨骨，至於郭采潔就着咗黑色deepV裙現身，露少少事業線。捧場嘉賓就有「家輝哥哥」張學友﹑陳慧琳﹑余文樂﹑邱淑貞﹑梁家輝﹑吳君如及陳可辛﹑黃智賢﹑江美儀﹑謝雪心及劉偉強等，場面熱鬧﹗

問到家輝對票房有冇信心？佢就話：「我自己就睇咗五百萬次，就唔係太緊張，但就好在乎觀眾睇完嘅評語，我對團體好滿意。」

講到林嘉欣喺電影中演張家輝嘅媽媽，而嘉欣喺剛過去周末榮膺金馬獎影后，家輝就話：「我真係好開心，都唔知點解咁開心。」會恭喜佢？家輝就話：「其實我哋私下冇乜交住，剩係合作呢套戲，不過佢真係演得好好。」

另外，郭采潔喺電影中演水鬼，問佢辛唔辛苦？佢就話：「都辛苦，因為拍鬼片要再晚上拍，每天也要捱夜，很容易水腫，剛好我演的是水鬼，是一個水腫的水鬼。」

此外，學友喺戲中有客串演出，不過就只係喺最尾，得好少戲份，問到家輝學友有冇因為咁而投訴，佢就話：「佢都唔知我拍咗咩，但最尾只係用咗兩個shot，但呢兩個shot都會好令觀眾印象深刻。」家輝又話如果觀眾鍾意的話，都會有可能拍下集，但唔會係短期內嘅時，會做番演員先。