台灣著名作家九把刀嘅小說有唔少人都睇過，而佢嘅著作有唔少都改編成電視劇、電影等，而當中九把刀第一部親自執導及編劇嘅作品《那些年，我們一起追的女孩》仲曾經帶起過一個熱潮，唔少人睇完都諗返起自己青春少艾時有幾少不更事，又或者有幾年少輕狂，引起好多觀眾嘅共鳴。

而繼《那些年，我們一起追的女孩》之後，九把刀編劇嘅《等一個人咖啡》以及《樓下的房客》都再一次咁掀起熱潮，前者講述大學生嘅生活，仲搵嚟女神周慧敏演出，而後者就一改以往電影風格，拎咗九把刀小說中嘅懸疑片嚟改編，仲搵嚟任達華擔綱，其實喺九把刀嘅改編電影除咗有女神影帝幫手之外，仲捧紅咗唔少台灣嘅演員。

柯震東
2011年柯震東一出道就飾演九把刀電影《那些年，我們一起追的女孩》中九把刀自己嘅化身柯景騰，原本係學校當中嘅問題學生，因為想追求女主角而改變，可惜最後因為年不更事而同女主角分道揚鑣，而正正就因為呢個角色令到柯震東紅遍中港台。

陳妍希
早喺2006年已經喺台灣拍攝偶像劇嘅陳妍希，雖然都有做過下女主角，但係除咗喺台灣之外名氣一路都差咁啲，直至喺《那些年，我們一起追的女孩》中飾演女主角沈佳宜，學生Look瞬速打入各地網民心中，更被喻為女神。

宋芸樺
喺2014年，當時仲係大學生嘅宋芸樺參與電影《等一個人咖啡》嘅女主角試鏡，九把刀見到佢就即刻表示「這個女生就是來演《等一個人咖啡》的。」而事實就証明咗九把刀冇睇錯人，電影上映後宋芸樺既可愛又令人可憐嘅形象成功令佢爆紅，之後更接拍另一部青春電影《我的少女時代》，更進一步紅遍中港台。

邵雨薇
經台灣綜藝節目出道嘅邵雨薇本身拍開台灣電視劇，直至2016年參演九把刀編劇嘅作品《樓下的房客》之後被香港觀眾熟悉，戲中同影帝任達華對戲亦毫不遜色，而佢嘅表現更令佢入圍角逐「台北電影節」最佳女主角嘅殊榮。