佢姓楊，單名一個「彧」，經常考起好多人唔識點讀，其實粵音讀「旭」。最近多得佢幫手穿針引線，連結社區同工運，協助長沙灣海麗邨外判清潔工討回大部份遣散費。生於福建家庭，今年32歲嘅佢係民協區選票王，亦係副主席，中學時受到一個人嘅政治啟蒙，就係公民黨前立法會議員吳靄儀。

受吳靄儀邵家臻啟蒙

中學讀慈幼英文學校，楊彧係時事問答常識學會主席，代表學校出戰港台校際常識問答比賽，美國同伊拉克打仗期間，亦喺校內發起反戰宣傳。讀中三、四時有堂作文課，題目係年度最出色人物，時值居港權事件，佢寫吳靄儀，認為對方挺身反人大釋法，捍衞香港法治，對佢影響深遠。
升讀理大社會政策及行政學系時，楊彧遇到另一個啟蒙導師，就係當時教社福政策嘅現任社福界立法會議員邵家臻。楊彧話對方教學不拘小節，可以喺咖啡店嘆住杯cappuccino或到陽明山莊食住自助餐present功課，但最重要係教導佢關顧基層，唔好歧視新移民，不應蔑視綜援戶，因為人人生而平等。
楊彧係家中獨子，5歲由福建來港，小時住北角，讀蘇浙小學。佢坦言父親偏向保守，親戚面前少談政治。2015年區議會選舉，佢以3,477票勝出荔枝角南議席，成為民協票王，前年更當選副主席。