公眾認識阿廷,一般係佢廉署前調查主任嘅身份,查實佢中大畢業後第一份工係喺何俊仁當年嘅屯門辦事處做職員,專門處理地區個案,跟住升做民主黨研究主任、主席助理等,後來因為不滿黨內一啲行政安排而裸辭。阿廷失業4個月,當時兩個小朋友一個兩歲,一個兩個月,生活都幾艱難,之後考到廉署,太太Winnie不知幾開心,所以當太太知道何俊仁搵佢返去做總幹事,即時「崩潰」,笑言嗰段日子壓力好大。其實阿廷同太太係中學同學,又點會唔了解對方?阿廷話佢哋中二時坐隔籬,上堂不時傾偈,中七考A-Level時仲日日煲電話粥,一考完試梗係嗱嗱臨約人食飯表白。結果如何?毋須八方多講喇啩!