【新增短片】
有團體調查發現，在新市鎮街市以外的新鮮糧食店比例太低。其中在將軍澳區，街市以外的新鮮糧食店，人均比例為一店對9,100人。在將軍澳彩明街市買餸的楊小姐指，將軍澳選擇少兼價格貴，在街市以外只能光顧惠康及百佳，「係呀，選擇少架，嚟嚟去去都係呢幾種」，她稱舊區如筲箕灣物價較平，「買豬骨30、40蚊就煲到湯，呢度（將軍澳）要40，50蚊」。她指其母親會由筲箕灣到將軍澳照顧小朋友，順道替她在筲箕灣購買豬肉及魚類，每餐能節省20元。

在將軍澳居住多年的何太指，「商場轉晒形式，畀某大機構佔領晒啦，規定商戶要賣咩，佢哋冇得選擇，我哋更加冇選擇，以前見到有啲小商戶，依家裝修後都冇咗喇」。她指街市以外，數年前也有一間凍肉鋪，「依家都執咗啦」，直言現時是焗買，「10個屋邨9個都係咁」。她亦有留心街市被部份大財團壟斷，「有時睇到佢哋（職員）周圍走（不同檔口），佢哋話唔同老闆，其實咪又係同一個，將軍澳區可能都係同一班人，人哋有錢租多幾個菜檔，請多幾個職員，冇法架。」

居住天晉的葉小姐表示，彩明街市已較將軍澳其他街市多選擇，但價格仍較荃灣等地區貴三分之一，「一家四口每餐貴60至70蚊」，認為是因區內人口多但街市少，貴租趕絕小商戶，政府規劃有問題。曾在荃灣居住的她指，荃灣有街市以外的新鮮糧食店，但將軍澳卻是獨市「好唔慣」。