「誰願意身體每處任撫摸　誰願半點朱唇吻千個」，現年52歲嘅劉美君喺80年代憑情慾歌《午夜情》爆紅，之後嘅《最後一夜》、《愛是無涯》、《一雙舊皮鞋》都好受歡迎，08年喺紅館開處女個唱，相隔足足9年後，將於今年10月14及15日再䂿紅館舉行「劉美君千色演唱會」，歌迷都興奮叫好，不過，據知劉美君嘅個唱海報，竟然被紅隧以驚嚇為由要求下架！

呢張海報有兩個劉美君，一個係烈焰紅唇靚樣，一個係噬大口嘅猙獰表情，十分出位。據了解，有關當局認為海報或會令人產生幻覺、驚嚇，擔心會造成交通意外，過唔到審批。《蘋果》向劉美君所屬環球唱片了解，發言人承認：「上個禮拜四（22日）收到通知，都無辦法，因為呢個係當局監管機制，怕會造成交通意外，公司惟有配合，重新設計另一款海報。」

問到海報設計原意係乜？環球表示：「演唱會同海報概念都係劉美君諗嘅，原意係展現佢多變嘅一面，配合番演唱會《千色》主題。」為咗如期喺29日推出廣告，環球喺短時間內交潔淨版，冇咗海報原意。對於海報被禁，劉美君回應：「第一下反應係愕然，突然間被ban咗張海報，但再諗下係開心嘅，因為貫徹劉美君係要被ban下。」

劉美君嘅人生經歷的確好精彩，18歲嫁第一任老公黃泰來，誕下一子一女，92年離婚；02年經閨蜜林憶蓮介紹認識第二任甄姓老公，40歲高齡誕下女兒，08年又離婚，47歲已做嫲嫲，現任男友係混血靚仔。