熊黛林(Lynn)舊愛郭富城，有樓有名跑有舞技有天王名銜，不過Lynn嘅準夫婿郭可頌個底都唔弱。

郭可頌係郭可盈嘅弟弟，今年38歲，佢對上有兩個家姐，阿Lynn同郭可頌嘅紅娘，正正係家姐郭可思。郭可頌除咗打理估計資產約百億家族生意外，個人亦擁有出口貿易公司同自創家品品牌，生意遠銷內地同歐美國家，估計逾億。

郭可頌嘅爸爸郭達昌經營塑膠廠起家，多年嚟投資有道以買賣物業獲利，其父母共同擁有五間公司，郭爸爸喺5年前離世後，郭可頌係五間公司嘅董事，並接手其中嘅「寶昌製品廠有限公司」同「易通玩具製品廠有限公司」。

郭可頌前年同熊黛林相戀後，被爆於2012年曾與叫Ami嘅女子結婚，二人翌年底協議離婚，佢辦完離婚手續後，先同熊黛林表白，免得女友被指係第三者。

一顆恨嫁的心 +Mr.Right + 啱timing = Lynn終於成為郭太，係郭可頌太太！