蔡一傑難忘拖實Jacky Ma中環街頭大暴走 阿葛50蚊剪十兄弟頭領潮流

蘋果日報 2020/12/22 18:25

安息禮張智霖袁詠儀
    因癌病於本月初離世的星級髮型師馬桂燦（Jacky Ma），其家人今日於灣仔循道衛理聯合教會國際禮拜堂的一樓聖堂設安息禮，儀式後靈柩奉送火化。在安息禮上，Jacky Ma生前的一眾好友如：太極的劉賢德、陳小春、張智霖、袁詠儀、蔡一傑、蔡一智、蘇志威、軟硬等人，先後透過短片分享與Jacky相處的點滴。
    Jacky Ma生前和娛樂圈關係緊密，90年代他成為全港最紅的星級髮型師，同時亦是軟硬天師、草蜢、達明一派、鄭伊健等的御用髮型師，草蜢三人分別在短片中分享過往的相處軼事，蔡一智說：「認識Jacky嘅朋友，大家都好楚知道佢嘅性格，佢係一個非常隨和嘅人，就算有幾忙，只要你約佢，佢都應承得你都義無反顧，只不過係唔知要等幾耐、唔知幾時先出現，就好似啲飛站巴士，冇人答到，Jacky Ma，我哋都等得你耐，輪都輪到你等番我哋。」蘇志威說：「30幾年嚟同我走勻全世界，做乜自己走咗去天堂呀？不如咁呀，喺嗰邊自己準備定場地，佈置好晒，準備好音樂，我哋一定會去你嘅party！」蔡一傑則說：「我記得有一次喺佢公司剪完頭髮，諗住一齊落去食嘢，點知落到有10幾個記者追訪，佢又唔知點答，我咪二話不說，一手拖住佢喺中環跑咗幾條街，啲途人又唔知我哋發生乜嘢事，只係見到兩個男人拖住跑咗幾條街先停，停地之後，Jacky Ma就話：『好彩有你咋！』諗番都覺得幾好笑。」
    其後林海峰亦說：「之前Jacky WhatsApp我，問我幾時搵佢剪頭髮，我隔咗一陣先覆佢，然後佢一直都冇再覆我，我喺一啲同佢嘅WhatsApp入面睇返啲對話，發現咗好多Jacky喺夜麻麻send畀我嘅YouTube link，我喺呢度同大家一齊分享吓《Five Hundred Miles》，佢專登揀日本版，我估佢而家喺日本玩得好開心，不過我都想同佢講：『剪頭髮呀，等緊你呀！』」黃耀明則表示：「Jacky，你離開咗我哋，我哋嘅世界從此冇咁靚，冇咁型，我哋會記住你一切嘅美好。」鄭伊健笑稱朋友間一直用「神奇馬」來稱呼Jacky Ma：「佢咁多年嘅外形一直都冇變，佢鍾意食嘢，大家都知喇，無論去邊個地方，佢都鍾意周圍搵嘢食，就算整頭髮嗰陣，佢都鍾意食糖。」
    葛民輝在短片中感謝劉天蘭的介紹而認識對方：「記得18歲就開始幫襯Headquarters，嗰陣係搵Jacky Ma，有幸係因為喺ESPRIT嘅part time，可以半價去剪頭髮，真係要多謝劉天蘭姐姐開咗條咁靚嘅路，可以剪個靚頭。我記得當年嘅半價係50蚊，嗰陣覺得完好爽，搵上海佬剪都係咁上下，仲有得洗頭喎。到第二次去，Jacky Ma就同我講：『你下次唔使畀錢，今次都唔使，因為你係我哋嘅house model！』所以我成世仔只係用過50蚊去幫襯Jacky Ma，真係好感謝！但係我記得我阿爸問過我，點解我個頭搞成咁？佢話我個頭剪到好似十兄弟，於是乎當年ESPRIT係好興呢啲十兄弟頭。而家小弟用電剷自己剷，等佢好耐㗎，等成4個鐘，好多阿太等佢。」阿葛在《川保久齡大戰山本耀司》中亦有提及Jacky：「我既然扮得設計師就要去Headquarters搵高佬Jacky電番個靚頭學Terrence Trent D’Arby」，可見當年他帶領潮流。
    empty
    蔡一智大讚Jacky Man為人非常隨和。（影片截圖）
    empty
    蔡一傑難忘帶Jacky Ma喪跑，擺脫追訪的傳媒。（影片截圖）
    empty
    蘇志威指Jacky Ma先行一步，着對方要預先佈置好那邊的場地，以後再去會合對方開party。（影片截圖）
    empty
    Jacky與草蜢相交30年。（IG圖片）
    empty
    林海峰稱以往收到Jacky Ma不少分享link。（影片截圖）
    empty
    阿葛笑言成世仔只用過50元去幫襯星級髮型師Jacky Ma。（影片截圖）
    empty
    軟硬與Jacky Ma一直合作無間。
    empty
    鄭伊健（影片截圖）
    empty
    （IG圖片）
    empty
    張智霖（影片截圖）
    empty
    袁詠儀（影片截圖）
    empty
    呂珊（影片截圖）
    -----------------------------
    《蘋果》英文版免費試睇：了解更多
    英文版已登錄《蘋果》App，立即下載/ 更新：iOS / Android
    -----------------------------
    支持蘋果深度報道，深入社區，踢爆權貴，即Like蘋果專題及調查組FB專頁！