恭喜晒，前輪后趙海珠（Alison）上星期六順利誔下細女，三歲幾嘅哥哥陳彥熹（Hayden）喺醫院見到妹妹時，似乎暫時未識得畀反應，不過Alison一早為大仔做好心理準備，哥哥應該可以幫手湊妹妹喇。

聽Alison講，佢陀呢一胎相對舒服，而且因為係陀女，荷爾蒙影響下，佢自己皮膚都幾靚，難怪佢過去呢一年，可以不時打扮得靚靚出席公開活動。佢呢一胎都係開刀，細女出世時約重6磅，暫時未改名。

其實Alison自2013年初生完仔之後，就冇做輪后，曾經有一段短時間去過四叔旗下恒基地產（012）幫手賣樓，2014年開始專心湊仔，只係平日喺dbc數碼電台兼職做財經節目，得閒又接記者會司儀、產品代言人等工作，家陣有一對仔女湊夠一個好字，如此生活真令人羡慕。

掌握財經生活資訊，即Like「蘋果ATM」fb專頁啦！
http://fb.com/appledailyatm