上回講到大家有1000萬，會選擇係香港買個劏房亦或移民海外尋求更優質的生活。之不過，人生總是百般無奈，有錢有時亦並不能隨心所慾，話走就走。所以，今次貼地一點，留番係香港，同大家分析下，如果有200萬，你會選擇投資依家好熱門既兩類資產，車位亦或劏房？

話說最近係屋企附近，想話買/租個車位自用，無他，距離市區一小時生活圈，揸車點都方便好多。同Agent八吓，不得了，偏遠地區三線屋苑室內車位盛惠接近100萬；租的話就2000蚊多啲，唔係自用，投資的話回報率唔夠3里。換句說話，你買左，要接近四十年先回本。如果二百萬，買兩個車位，一個月袋五千蚊，爽呀！咪住，真係爽？

話說月頭公屋王鳳德村126呎劏房創新高呎價轉手，原來只係195萬，市值租金收緊成8000蚊，回報率接近5里。同樣200萬，買兩個車位定一間劏房好？

首先，香港地咁細既地方，車從來都並非必需品，佢同你屋企既新玩具一樣，可有可無，可以隨時放棄。依家經濟好，有錢當然出架車玩下；經濟唔好，要減開支，第一件事就係放棄部車，無情講。其次，當你夜晚落街散步，見到通街都係車泊係度，你會發覺原來車位係無「剛需」架，朋友。最後，原來劏房回報率仲係遠遠跑贏車位。假設資產價格回落，你估揸住低回報率又無「剛需」支持既車位安全啲，定係有間屋(雖然細少少)係手安心啲？

即係咁，樓就話唔好租，有需要就要買；車位，買就不了，平平地租2000蚊一個月，業主加租？我咪劏左架車唔揸，無咩所謂既，係咪先？

咩路
Fb.com/whichroad

蘋果財經，關心你飯碗
http://fb.com/appledailyatm