中秋之後緊接九月重陽，今年馬年出現極為罕見嘅閏九月，有幾罕見？對上一次距今182年，下次則要到下世紀2109年。八方聽坊間唔少人講，指閏九月帶來天災人禍，但玄學家話唔使太擔心，「中國人傳統對少見現象都會驚啫」，但閏月確較易有政治動盪，所以要注意佔中，不過示威集會凝聚力或到明年羊年才更強大，「羊象徵羊群聚集」。
八方知道，部份長輩今年為子女等送上利是，聲稱係為保平安，「今年閏九月，對後生仔女唔好㗎！」今年馬年屬閏九月，即是農曆有兩個九月，十月要延至新曆11月22號至開始。
玄學家麥玲玲解釋，明朝以前閏月冇一定規範，清代至規定閏月需按節氣而定；陰陽二十四節氣，包含十二個中氣（春分、穀雨、小滿、夏至、大暑、處暑、秋分、霜降、小雪、冬至、大寒同雨水），及十二個節氣（清明、立夏、芒種、小暑、立秋、白露、寒露、立冬、大雪、小寒、立春同驚蟄），相間地排列，而每個月須包含一個節氣同一個中氣，否則該月就定作閏月，並以上一月為名稱「閏某月」。
例如今年陰曆原本嘅十月內只有節氣「立冬」，並冇中氣「小雪」，因「小雪」落喺下月初一，因此呢個月份就唔叫十月，而定為閏九月，之後一個月至叫十月。馬年因而多一個月，共384日。

長輩派利是求平安

佢話雖然「十九年七閏月」，但閏九月較少出現，上次係1832年，下次則要到2109年，相隔95年。「中國人對於少見現象如日蝕都會驚」，故坊間長輩擔心閏九月年易有天災人禍，所以會畀利是家人求平安，金額多係象徵吉祥嘅數字例如6、9、8。
佢表示玄學上並冇所謂閏九月年份較差嘅講法，一年運程應以天干地支等計算，而傳統雙春閏月更被認為係結婚好年，「數閏四月就多人結婚，咁九月係重陽就未必」。
不過，佢話閏月本身除易有交通意外，亦易出現動盪政局，明年羊年會有更多社會活動，因群居嘅羊象徵聚眾，而且中國喺馬年、羊年都易有政治不穩，如1966年同67年嘅文革。玄學家楊天命都認為閏九月喺玄學上並唔代表吉凶。
天文台表示，地球繞行太陽一周就係一年，24節氣係根據地球繞太陽運行公轉軌道上一周360度所處位置劃分，二十四節氣正好成二十四等份，即每個節氣相差15度。春分時為0度，清明時為15度，餘此類推。
不過，發言人話由於地球圍繞太陽軌迹呈橢圓形，每轉15度所需時間有快有慢，當某啲日子需更多時間至可轉15度時，有關節氣就未能及時喺慣常月份內出現。「閏九月少其實有科學解釋，唔使諗太多」，他解釋，地球喺冬季離太陽較近，較快到15度，節氣間相隔只十四日多，一個月內易出現兩個節氣，故較少閏月；相反夏季地球離太陽較遠，節氣間相隔達十六日多，閏月較容易出現。
按統計，農曆三、四、五、六、七月閏月較多，閏十一月只喺1650年出現過一次，閏十二月同閏一月更從來未出現過。

李八方
mailto:[email protected]