當年今日
關於我們

【中環吋嘴】一國兩制 你制我唔制

蘋果日報 2019/09/05 21:30

中環吋嘴財經財經

林鄭閉門見班商家佬,話有得揀會辭職,跟住見記者又講話冇向阿爺請辭,呢位女特首唔單止兩頭蛇,直頭好似希臘女神Medusa咁,成頭都係蛇!真係封佢做女神,祝佢「瘋」行全世界,嚟緊出埠外訪就見人講人話,見鬼講鬼話咁喇,希望林鄭救港嘅神話不會破滅。星島老闆何柱國都批啲官,「縮頭縮腦、又無能、又怕事唔做嘢」。唔識解讀共產黨嘅說話就死得,習大大都話明「敢於鬥爭、長期鬥爭」咯,所以刻下香港都鬥瓜鬥臭啦。80年代移民潮,本少爺喺北美開山劈石之時,為咗緊貼大陸同香港時局,飽讀係唐人街先買到嘅《南北極》、《開放》、《爭鳴》等雜誌,好多語錄到家陣都啱聽,除左同學生哥講:「不要爸爸,不要媽媽,只要國家」有句聽上去似爛gag「一國兩制,你制我唔制」突然湧上心頭,温馨提示,此話乃從阿爺角度出發,一國兩制,係阿爺唔制啊!香港人嗒真啲,就明白笑中有淚。

9月2日起升級條件將更新 繼續每月撐壹仔 講真心話撐住我香港!
empty