由韓國影帝黃政民、韓片《與神同行》男星朱智勛、韓劇《未生》男星李聖旻以及韓劇《Signal》男星趙震雄主演嘅新片《北寒諜戰》，有份入圍今年5月舉行嘅「第71屆康城影展」午夜單元，電影更大讚好評，獲全場3千觀眾拍掌5分鐘(相關新聞連結： https://bit.ly/2MgzrH4 )。

《北寒諜戰》大前日喺韓國當地公映後，立即狙擊上映中嘅賣座電影《與神同行》下集《與神同行：終極審判》，截至韓國時間今早7點，《北寒諜戰》上映第四日就突破100萬入場人次，成績相當好，趙震雄更公開咗佢手持插住「100」字眼蠟燭嘅蛋糕，賀新片突破100萬觀影人次。

《北寒諜戰》將於下月6號喺香港上映，電影改編自南韓策劃嘅真實間諜任務，講述代號「黑金星」嘅南韓情報員（黃政民飾）企圖潛入北韓探聽核武情報，先被派往北京假扮成商人跟北韓進行交易，當佢成功贏得北韓領袖金正日嘅信任之際，卻不知不覺已成為兩韓嘅磨心，捲入領袖嘅權力鬥爭風暴。

《北寒諜戰》預告連結： https://bit.ly/2OYY8q1

更多韓流，喺晒《娛果》
http://fb.com/appledailyent