周秀娜(娜姐)以2000萬簽約蕭定一嘅中國3D數碼娛樂公司,拍攝12部電影,今日喺黃埔舉行簽約儀式,娜姐以大露背開衩裙示人,於兩名大隻水手陪同下,坐遊艇到現場,上船時因為大風裙被吹起,娜姐一雙美腿盡現人前。
對於有2000萬片酬,娜姐坦言:「好開心蕭生咁信任我,都想喺電影方面做啲成績,可以有好嘅作品。」
對於會否感到壓力?佢話:「暫時都未有嘅,咁我當然希望拍嘅戲有好票房,但呢啲我控制唔到。」
問娜姐會點用呢筆厚酬,會唔會去買樓?娜姐表示未有時間睇樓,暫時唔會置業,但就買咗一架Benz,作為對自己嘅獎勵。
要拍12部電影,合約有冇寫明唔准準拍拖結婚大肚?娜姐笑言:「可以結婚,但唔好拍拖同唔可以生仔,自己都冇諗住拍拖,事業為重先。」