當年今日
關於我們

【收市閒情】一國一制後 香港隨時「共你個產」(千頌C)

蘋果日報 2020/06/02 20:10

一國一制收市閒情千頌C

「港版國安法」下,香港一國兩制正式玩完,香港走入中國特色社會主義,未來當然會入鄉隨俗,就係「共你個產」。

睇往績,1950年代初期,中共建政,真係好快就推出「公私合營」大計,派啲黨委入去民企入去做幹部。要講比較出名嘅故事,可以數返永安百貨(289),當年第二代郭琳爽,原本上海永安總經理,上海解放後,佢決定「相信黨!唔怕」,1956年仲同中共合作搞「公私合營」,為黨中門大開。

黨大於一切!你係民企老闆咩?黨大定老闆大?表面是「公私合營」,實際「公大過私」,就好似「一國兩制」,國大過你個制咁。結果10年後,郭琳爽被批鬥,上海永安招牌被紅衞兵拆埋,公司仲俾黨食埋,變成國營企業。

歷史係一個循環,1950年代嘅招數,到近年又重新上演。阿里巴巴(9988)馬雲、騰訊(700)馬化騰、聯想(992)柳傳志、順豐王衛……一個接一個卸任;100名「政府事務代表」安插阿里在內等100間杭州企業;黨委進駐各大上市公司。當中國走「國進民退」國策,大家認為一國一制後的香港,可以逃過一劫?

先進駐,後侵吞;有錢,就自然有真正決定權,呢個策略明顯不過。近來同位地產界老前輩食飯,佢一句說話有如當頭棒喝,「近來有邊間地產商,引咗黨員入去嘅,就最危險」。的確,有地產商上年就引入黨員做獨董,然後最近又將商業地王項目引入國企。提到呢單刁,前輩就話:「呢單佢蠢渣嘛,買貴第二標書成100億,仲要走去搵第二標間傾地產商合作,人哋梗係唔騷佢,眼光出名好,點會接火棒。」結果有人要履行國家任務;有人就要搵人接貨,一拍即合,就促成今日染紅局面。

《國安法》下的香港,港交所(388)成中概股「難民營」,最新傳併多多都來港第二上市;大部份港資唔係染紅,就會撤退,好似東亞(023)咁。香港上市大企業資產乾坤大挪移;細價殼股亦如是,近來開始多人想執殼股平貨。不過,同上次提過有新上市公司死都唔找marketing fee情況差唔多;最近又聽到有主板殼圍飛炒上30幾億市值,連下一手買家都ready,但到FA(Financial Advisor)追數時又走咗去,再一次印證上次講過嘅香港新常態:走數、染紅。
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
屬於香港人的移民攻略
立即登入【全球樓行】
Dream House零距離