新片《追龍II：賊王》今晚在九龍灣舉行首映禮，3位主角梁家輝、古天樂、林家棟，及王晶、何浩文等出席，在首映禮上3位主角被問到合作的感受時，梁家輝笑古仔是影壇大亨，他說：「秋生講㗎，我哋14年冇合作，難得有今次嘅機會，雖然合作好辛苦，但非常愉快。古仔就辛苦啦，一日走幾組，香港、內地兩邊走，家棟好啲，因為佢發展自己嘅事業，做製作、編劇，幾線發展，而我呢就比較舒服啲，因為我係退休人士，但係大家能夠走埋一齊，都係開心嘅。」儀式上，大會送上榴槤給各人。

問梁家輝是否食榴槤食到驚？他說：「唔係，都不知幾開心，難得有合作嘅機會。（想唔想再合作？）想呀，不過我退休喇喎！」記者追問《追龍》是否他的退休之作，梁家輝笑言：「退休就唔等於退役，最緊要觀眾同導演對我有諗法，我係唔會推嘅，會做到最後一部為止，希望呢一套係好耐之後事。」

林家棟接着說：「我都係等緊你call之嘛。」梁家輝即叫身邊的2位要關照自己，古仔亦表示會關照對方，梁家輝笑言：「其實唔使佢關照，最緊要係諗起我。」

問到古仔拍攝是否辛苦，他說：「一啲都唔辛苦，我係工作狂，不過家輝都成日叫我要小心身體同body check。」提到梁家輝叫他早點結婚，梁家輝即說：「唔好喺呢啲場合講呢啲啦，好尷尬。（咁你想唔想古仔快啲結婚？）每個人嘅選擇都唔一樣嘅，我點知佢點諗，我嘅立場、身份同年紀就梗係想佢哋快啲成家立室，有個完美啲嘅人生啦！但係如果唔結婚、冇拍拖、冇家庭，唔等於冇一個完美人生嘅。」他更指古天樂是一個工作狂。

林家棟表示與古仔有個共通點，就是「放生自己」，梁家輝補充說：「我亦都冇話自己行咗入條死路呀！」問古仔是否會聽梁家輝話，他說：「聽，不過感情嘅嘢，我就對邊個都唔聽。」林家棟再說：「算啦，隨緣啦，人要愛惜自己，唔結婚就係愛惜自己嘅表達。」他更笑言自己受過內傷。

------------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
--------------------------------
【記住63836568】全民爆相爆片！下一個爆料王就係你
https://bit.ly/2Guolu9