今日係情人節，敏妮祝各位HappyValentine'sDay。今年姊妹們嘅情人節禮物應該好大份，因為敏妮噚日睇到個報道，話06年香港百萬富翁擁有嘅流動資產，比05年多咗160萬蚊。不過，最有趣嘅係調查發現，有高達83%嘅百萬富翁有投資股票，至於投資物業嘅就有68%，反映百萬富翁不會只持有現金，因為佢哋認為，啲現金係唔會自己不斷「繁殖」嘅，只有投資至能夠令人致富。
股王A：「敏妮，你之前咪話退休前先要學識炒股嘅，個調查同你講嘅嘢好脗合噃。」
「我細細個嗰陣媽咪已經同我講，錢搵錢先至有錢途。」

邱sir：「我夠知啦，弊在冇本哩。我抽新股要借孖展先話搶到幾手，仲要提心吊膽驚蝕息，香港畢菲特李四叔郁吓都掟幾億銀出嚟掃貨，對於佢嚟講，新股唔係『抽』返嚟，而係『攞』返嚟。唔講遠啦，我識個上咗岸嘅炒友，買貨講親都幾球，升一兩格已經可以沽貨收錢；我哋呢啲細細注，升得一兩格都唔夠畀手續費。」
「雖然我唔係咁贊成借錢炒股，但根據個調查顯示，每名百萬富翁平均擁有總資產990萬元，其中總負債就佔170萬元，即係有成17%係債，負債當中樓按佔七成、個人貸款佔兩成八，汽車貸款就佔其餘2%。反映百萬富翁就算有錢喺身都會去借，越有錢越唔怕借，因為佢哋有把握還債，所以傾向錢搵錢。」

股王A：「借錢炒股唔係乜嘢罪惡，其實供緊樓嘅人，咪一樣都係借錢投資，唔需要咁抗拒，不過就要做足功課，同埋睇清時勢，好似𠵱家個市危危乎，就唔好咁博喇，我都沽咗唔少貨。」
靚秘書Chiling：「敏妮你啲股票呢？」
「之前見唔炒唔舒服嘅股王A咁緊張個市，我就知股市去到懸崖邊，我𠵱家除咗月供嘅股票之外，已經冇貨喺手喇。做百萬富翁要講心理質素，股王A成日話『市心就係人心』，我明白佢講乜，但仲未掌握到運用嘅竅門，所以暫時只能夠做一個平凡嘅投資者。」