唔知大家有冇用過，facebook有個功能叫「SeeYourMemories」！即係fb間中會提提你，一年前甚至幾年前嘅今日，究竟你出過啲咩po。

出名心直口快容易得罪人嘅邵子風，繼早排《G-1格鬥會》鬧爆有份參賽嘅唐紫睿(Hazel)同鄧穎芝等人，俾班女仔冠以「終極是非精」後，邵子風今日又喺自己facebook炮轟人，主角係上年同佢一齊演過舞台劇《現代馴悍記》嘅林超榮。

上年邵子風個po係咁寫嘅「乜NA唔係一早響排戲前講晒嘅咩？點解一邊排戲一邊加NA？去殯儀館加NA；上堂教書加NA；個女攞Passport又加NA！咁當初唔駛夾期啦！」冇開名，呢次係暗寸人。

一年過後，邵子風見番自己呢個po，都仲覺得嬲嬲。今次就索性開埋名鬧:「一年前的今天。今天可以開名了！林超榮呢個X街，同專業還有好遠好遠嘅距離！」

對於開名鬧林超榮，邵子風今日以電話回覆《蘋果》話：「上年唔開名，係驚影響舞台劇演出，依家講，係見到fb提醒我上年發生咩事。總之上年拍劇嗰陣，有人用好多唔同藉口，臨時話唔嚟得，咁NA意思係NotAvailable(唔得閑)，咁有咩理由8點鐘綵排，佢8點半send張相嚟話自己喺殯儀館，臨時通知唔嚟得？」

問邵子風會唔會再同林超榮合作，佢斬釘截鐵話：「可免則免，應該唔會再合作，會令我着嘅人有三樣嘢，一唔尊業，二冇良心，三係唔愛護動物，講完！」