朱凱婷今日同老公Dickens及6歲大嘅囡囡Sheryl喺清水灣鄉村俱樂部出席「第六屆2人3足勵同行」，佢透露噚晚同囡囡一齊練習二人三足，兩母女夠晒合拍度，加埋嗲哋三人四足都仲得。

朱凱婷稱除咗主持工作外，想抽時間多做慈善工作，佢仲話想過多兩年，帶埋囡囡一齊做探訪，怕唔怕辛苦？朱凱婷話：「我入行初期，成日出外景，去過啲少數民族嘅trip，我係捱得，如果我帶個女去，最好係暑假或者長假期。」佢希望藉住慈善探訪，話俾個女知道香港小朋友好幸福。會唔會喺物質上滿足個女？朱凱婷坦言：「其實係多過足夠，所以我會將佢嘅玩具捐出去。」