下個月做新娘嘅姚樂怡噚日同未來老公AlanNg喺油麻地學習傳統婚嫁禮儀，平日好男仔頭嘅樂怡同Alan一齊即化身小鳥依人，全程陰聲細氣。佢哋喺現場學點樣過大禮，樂怡又好恩愛咁同Alan互餵嫁女餅，樂怡仲大騷老公設計嘅靚靚喜帖，認真羨煞旁人。
樂怡話Alan係元朗圍村人，所以要跟足傳統選擇中式禮餅，婚宴會喺下月分兩日舉行，4月26日先喺酒店擺酒，29日就會喺元朗擺100圍食盆菜，到時會有十個兄弟同十個姊妹。

樂怡話Alan係屋企大仔，對於生仔壓力，愛妻心切嘅Alan話：「睇吓點啦，生兩個夠，太多好難控制。」樂怡即甜絲絲話：「太好嘞，家要減磅，要減13磅，下星期會去日本影婚紗相，唔擔心輻射，文頌嫻都話冇事，我信佢。」
樂怡仲話未來奶奶同老爺都好錫佢，反而家最煩係搞婚前派對，佢話好友湯盈盈玩得好癲：「佢最賤格卑鄙，有啲賤格遊戲都係佢諗，叫佢快啲結婚，要玩番佢。」
對於有報道話周家蔚同洪天明婚禮上，姊妹群起媾男星，樂怡覺得報道唔可信，佢係現場又睇唔到，佢仲反擊班兄弟話：「佢哋嗰班人係瘀血，不過佢哋都當我係瘀血，咁靚仔咪畀人媾吓囉。」