日前擔任陳慧嫻演唱會尾場嘉賓嘅許志安，今日現身荃灣出席佢代言健康生活概念品牌廣告記招，並跟廣告中拍擋導盲犬一齊合照。

安仔指平日外出工作飲食，返到屋企就鍾意食得清淡啲，最愛就係食蒸魚，兼透露係由太太鄭秀文下廚，身邊擔任司儀嘅阮小儀即笑指只要見到最愛就食乜都甜，攪到安仔尷尬傻笑。

喺慧嫻演唱會上合唱《女人之苦》，安仔當時祝願慧嫻快啲搵到幸福，點知噂日就爆出鄺祖德網上自爆跟慧嫻一段情，對於此事，安仔直言:「其實我唔知邊個係鄺祖德喎，不過我有關心慧嫻病咗，知慧嫻唔舒服，我打咗俾佢，佢話係，可能唱歌用力太投入，我之前都有經驗，我教佢心得，唔好講嘢一個禮拜就無事。」

安仔強調只關心慧嫻患病，佢再話:「其他嗰啲無嘢，第一我唔識佢係邊個，第二我唔八卦呢啲。」對於有人對號入座自爆情事，安仔覺得呢個世界有好多人，咩人都有，自己唔識點講，但最著緊係慧嫻病情同心情。

太太早前透露安仔戒煙成長兼肥咗，安仔承認近日係努力操弗中，可惜日前踢波時不慎拉傷右腳大髀內側肌肉，醫生指要休息一個禮拜，佢話:「當時我好驚，因為聽到啪一聲，好彩醫生話係肌肉有少少撕裂。」佢透露今年要做大隻安仔，預備隨時騷肌。