由韓劇《經常請吃飯的漂亮姐姐》女星孫藝珍孖《主君的太陽》男星蘇志燮拍攝嘅韓片《藉著雨點再愛你》，將於大後日喺香港上映。早前孫藝珍及蘇志燮於訪問中就分享拍攝時嘅點滴。

蘇志燮表示，當佢睇到個故事時，就好想演出，初讀劇本時佢感到好溫暖。孫藝珍及蘇志燮首次於大銀幕上飾演戀人，蘇志燮表示：「片中我飾演獨自撫養兒子嘅宇振，佢無法忘記去世嘅妻子秀雅。演呢個角色時，我諗起以前嘅回憶，令我好心動。而孫藝珍為咗佢嘅角色，都花咗好多心思，煩惱咗好耐，最後演出嘅效果都好好。」

孫藝珍就表示：「我演秀雅時，說話嘅語氣故意演得比較奇怪同生硬，我覺得呢個就係秀雅嘅樣。蘇志燮本身就跟宇振呢個角色非常似，外貌都相符，畀人好踏實嘅感覺。佢於戲中努力呈現好心動、好純粹嘅愛情。」提到戲中嘅童星金志桓，孫藝珍大讚：「因為金志桓之前冇演過戲，所以佢能夠將嗰種新鮮感同青澀感於螢幕上如實呈現。」

提到電影中嘅場景同音樂運用均非常出色，導演李章焄表示：「對呢部電影來說，晴天跟雨天所帶來嘅情緒，跟一般畀人嘅印象係相反。電影中，要落雨觀眾先會感到幸福，所以電影於顏色上特別做咗好多處理。雖然都係常見嘅場景，但於電影中望上去會特別美。我希望拍一部能令人再一次默默牽起對方雙手嘅浪漫電影。」攝影導演趙尚允就表示：「每當出現自然風景嘅場面時，我希望呈現一種清新自由嘅感覺，所以特別用咗好多長鏡頭。」

另外，人氣韓劇《金秘書為何那樣》男星朴敘俊亦有驚喜客串《藉著雨點再愛你》。朴敘俊因為正直嘅形象，獲導演邀請佢演出蘇志燮及孫藝珍長大後嘅囝囝，而朴敘俊更於飾演洪久叔叔嘅高昌錫有攪笑對手戲。

更多韓流，喺晒《娛果》
http://fb.com/appledailyent