神州數碼（861）個仔神州信息（深：000555）7連大勁升，翻半番之外，仲破咗上月高位，兼創埋半年新高。神數7日升5%咁大把，由上月高位計，19個交易日，仲累跌緊13%，神數殘到離晒譜！
呢期個市chok爆，神數被掟到甩轆，現價比上個月高位9.73元，累跌近1.35元或12%；比半年高位12.16元，更加累跌31%。但阿仔神州信息好少理，對上短短7日，累升62%。以神數所揸神州信息近3.9億股計，神州信息單係呢幾日股價放紙鳶，已經為神數帶嚟高達83億元嘅股本升值，或神數每股7.6元，神數現價講緊得8.38元！
再勻真啲計，增值仲犀利。神州信息今年6月尾每股NAV 3.3元人仔，現價比每股NAV凸章近42.7元人仔。神數應佔神州信息權益嘅股本總增值，折約高達200億港元，或神數每股增值18.3元，係集團現價2.2倍！連呢板增值反映，神數每股NAV 26元，得0.32倍PB。