丁子高與楊千嬅一直甜到漏，丁生更係廿四孝老公，今朝佢先出席山頂舉行嘅母親節活動，佢當時透露老婆千嬅今日趕及由南京返港慶祝母親節，仲話已經同囝囝Torres炮製相架送畀千嬅，果然今午就已經見到丁子高陪千嬅揀衫。

佢兩公婆約三點幾，去到中環嘅HugoBoss時裝店，即分頭各自搵衫，不過主力揀女裝，淡妝嘅千嬅主攻外套，丁生就喺另一角落幫老婆揀黑色連身裙，認真體貼。

隔咗一陣，千嬅攞住件外套向丁生揚聲問意見，睇嚟連走幾轉嘅丁生，顯得有點惘然。兩公婆揀了約15分鐘，便由秘道離開。

另外，晚上千嬅與丁子高及囝囝一家三口，到銅鑼灣西苑慶祝母親節，晚上七時許，千嬅抱住囝囝現身銅鑼灣，同行仲有楊媽媽三代同堂，佢哋快步閃入酒家，而丁子高泊完車後先到達，佢見到記者都愕然問：「知道我哋嚟食飯？」但佢亦有禮貌祝大家母親節快樂。