喺麗的做咗8年嘅黎小田，1982年過檔無綫旗下嘅華星唱片公司做總監，帶埋張國榮(Leslie)過檔，教佢由雞仔聲壓低key學貓王，結果令Leslie爆紅；而當年華星同無綫合辦「新秀歌唱比賽」，亦成功捧紅咗梅艷芳、呂方等歌手。

講番到同阿梅（梅艷芳）合作往事，黎小田最記得係俾阿梅鬧遲到:「阿梅成日遲到，我知佢錄音實遲到，我諗住有啲嘢做就遲啲去啦，橫掂佢都唔會咁早到，我遲咗9個字，點知佢早到咗喎，嘩，比佢鬧到吖！『點解你會遲到㗎？我都唔遲到啦！』」

有指當年係黎小田發掘阿梅參加新秀，黎小田就話:「佢喺華都舞廳唱，我就啱啱搞新秀，問啲行家有乜人可以介紹吓，邊個唱得好，咁有個行家話有個女仔唱得好好，叫我上去聽吓。有日晏晝我就上去茶舞聽聽，一聽，呢個好似徐小鳳喎，似得好緊要，咁就叫佢參加新秀。佢(阿梅)認得我，因為好耐之前佢同家姐(梅愛芳)參加過我哋《家燕與小田》節目，嗰時佢好細個，唔記得唱《香夭》定乜嘢，咁佢就驚，話帶埋家姐嚟(參加新秀)，我話好呀。到試唱嗰陣時，佢真係唱得好好，可能喺茘園喺歌廳唱咗咁耐。但佢係一個好倔強嘅人，譬如你鬧佢，佢唔會喊，忍住泡眼淚，我覺得呢個女仔有佢性格，嗰次有成十幾個評判，一致都係比個冠軍佢。佢唱就唱得好好啦，係無綫造比佢嗰件衫唔得，我就覺得娘咗小小，所以後尾劉培基幫佢全新打造，咁就變咗個百變梅艷芳啦。」

黎小田曾經結過兩次婚，佢82年同第二任太太關菊英結婚，但只維持2年就離婚收場。關菊英早喺10年前已經搵到個同性密友周利偉(Willy)做伴侶，問黎小田目前感情狀況又如何？佢話:「咪單身囉！我年紀大咗，主要做吓嘢，冇嘢做咪休息吓，拍吓散拖都有嘅，再結婚就冇諗過。」

場地：Dada Bar+Lounge

精選娛聞，喺晒《娛果》
http://fb.com/appledailyent