奧斯卡金像影后珍妮花羅倫絲（JenniferLawrence）主演嘅《飢餓遊戲》（TheHungerGames）系列終於要劃上句號，今個月上映嘅《飢餓遊戲3：自由幻夢2》（TheHungerGames：MockingjayPart2）已定本月20日喺北美開畫，三位主角開始落力宣傳，月中更會殺到北京開首映禮。

美國時間噚日，珍妮花同好拍檔祖舒夏捷臣（JoshHutcherson）、廉安咸士禾夫（LiamHemsworth）現身荷李活，獲安排進行打手印及鞋印儀式，吸引大批影迷到場支持。三位主角出席活動時心情靚爆，向來鬼馬嘅珍妮花期間擺出騎呢表情、甫士，又行近fans簽名合照，非常親民。