黃百鳴、張晉、鄭嘉穎、黎燕珊、黃浩然、湯寶如、謝天華等，噚晚喺銅鑼灣出席Cinema City JP戲院開幕活動，戲院老闆黃百鳴話暫時喺香港有旺角朗豪坊、柴灣、銅鑼灣3間戲院：「今年會開多5間，過年荃灣，銅鑼灣都會再開，大陸就喺上海開，我想喺香港開多啲戲院，經戲院商會統計過，香港最旺係有14萬個座位，但o依家4萬都冇，好多地區冇戲院，希望做到區區有戲院，仲想係地舖，大陸票房一直上，因為大陸會鼓勵開多啲戲院，由4千加到4萬，超越美國，成為全球最多銀幕嘅國家，希望同業多啲開戲院。」

張晉單拖現身，佢話老婆Ada(蔡少芬)有嘢做唔得閒。佢話：「啱啱喺美國拍完史泰龍部新片《逃忘大計3》，逗留咗個幾月，部戲打得好勁，之前連拍3、4部戲，返到屋企見到個女突然大個咗好多，講嘢都成熟咗。」而喺美國期間，佢同家人都係靠視像聯絡，不過張晉就爆囡囡唔多鍾意：「抱唔到，又摸唔到，所以講兩句就走開。不過好開心拍到自己鍾意嘅作品，有得就有失，o依家得番屋企好似得天下咁，所以做人需要休息平衡下。」

講到Ada有份演嘅《老表，畢業喇！》，角色名叫「張進強」，張晉笑話：「唔知係咪王祖藍特登，我要問佢拎番版權費。Ada做戲我好放心，佢好勤力，佢拍戲時我都喺身邊，每個場口着邊件衫，佢都mark得好清楚，好令人佩服。

另外，同場嘅鄭嘉穎自稱成日入戲院睇戲，覺得同喺屋企睇戲係兩種感覺，尤其係大製作同多特技嘅戲，大銀幕睇比較好睇 ，佢話：「去戲院睇，唔怕唔方便，影張相簽個名都係幾秒鐘。」不過佢話同女友陳凱琳睇戲口味好唔同，自己比較鍾意睇男人戲，女友多數揀女人戲，仲會研究角色點做，不過係好戲都會一齊入戲院睇。