恭喜恭喜!娛圈又有喜事喇!大S前男友、35歲台灣藝人藍正龍，今朝早同大佢一年嘅周幼婷喺永和戶政事務所辦理結婚登記，正式結為合法夫妻喇!又一段姊弟戀開花結果喇!雙方經理人承認兩人確實此事，並表示兩人將於今夏擇吉日宴客。

藍正龍同周幼婷今早大約於11點左右現身，身穿便服，反而親友就執到正仲緊張。辦完手續後半小時便離開，兩口子還拍照留念。

其實早於本月12號，藍正龍已於網上騷鑽戒，外傳佢以150萬(新台幣)鑽戒娶得美人歸。兩人於去年11月被拍到過夜3天，戀情曝光。兩人都係「情史豐富」之人，藍正龍分同江祖平、林韋君、王怡仁及大S拍拖，同大S一齊更長達4年，大S後來嫁作人婦，最近當媽媽，藍正龍亦大方獻上祝福；至於周幼婷亦分別同馬志翔、孫協志、李李仁、王識賢等人傳拍拖或傳緋聞，與藍正龍相識13年，最後仲結為夫婦。如今藍正龍同周幼婷結婚，有網民口衰衰咁話:「起初我以為藍正龍眼殘了。」、「比大S好太多太多了啦……恭喜啊！」都有人誠心祝福謂:「好有夫妻臉^^~恭喜」

至於初為人母嘅大S，噚晚近10點左右，亦於微博晒幸福，貼囡囡希玥瞓覺覺豬嘅甜笑新相，仲話:「擁有自己的嬰兒實在太好玩了！軍式教育的事大家就忘了吧。現在根本是嬰兒不落地！每天抱緊緊〜媽媽的小肉球〜親親〜」