2017年樓市癲，1997年更癲，當時一手住宅物業銷售監管局尚未成立，地產商賣樓完全冇王管，經常被指黑箱作業，最賤的賣樓手法之一，就是同一時間賣樓有幾份價單，當現場氣氛好就抽出貴的價單，反應差就抽出平的價單去貨。

未有法例規模前，新盤售樓透明度一直為人垢病。美聯物業住宅部行政總裁布少明表示，相比當年，現時一手樓銷售透明度高很多，秩序亦好很多，以前「前後腳買呢，你高層可能平過低層，低層賣貴過高層都試過，發展商睇住售樓廠銷售氣氛，準備好幾張價單，氣氛好可能將個價就高啲賣啦，氣氛差可能就低啲價單去賣樓」，但今時今日就不能，三天前須公佈價單，所以對市民是好事，有足夠時間冷靜決定是否入市。

此外，之前賣樓經常賣通頂，如市況好當日可不斷大量加推，最經典是長實（1113）將軍澳首都及天水圍栢慧豪園均通宵賣樓，前者更賣到橫跨第二天的下午兩點。

以前新盤亦多向代理以「派貨」形式賣樓，即是發展商按不同代理分配單位，再由代理向買家配售單位，當中亦出現不公平情況，若買家與代理高層關係較好，才有較高機會「攞貨」。有時地產商派貨更睇心情，邊間代理「聽話」就多啲貨，唔聽話或過去銷售成績較差的代理，獲派貨的數量較少甚至「冇貨」。因此，多年來地產代理都不敢得罪地產商。

最經典是信置（083）的馬鞍山銀湖‧天峰，搞到代理逼爆場面，售樓處玩「叠羅漢」，大家要搶貨，「叠到三層高啲人要跨過叫發展商要員畀貨我啦」，所以當日做經紀都幾辛苦，「仲要玩埋體能」。今日就好有秩序，一些紅盤主力抽籤，順次序揀樓秩序比幾年前好好多。

當年發展商亦是玩排隊製造氣氛，1997年開售的觀塘麗港城便出現「白手襪黨」對「飲管黨」，先到先得，大家鬥排隊，有背景人士通常排前些。布少明稱，當日唔使炒樓先賺錢，俗稱「炒籌」的賣位都有得炒，當年賣位賣籌都炒好勁，一個籌閒閒地炒到10萬至20萬元，他印象何文田帝庭園炒籌接近200萬元。

布少明憶述，1997年炒賣最勁新盤，除了嘉湖山莊，最經典應是深井浪翠園，「浪翠園有青馬橋及汀九橋效應，放煙花，升得特別誇張，樓價都是放煙花」，當煙花一熄後就跌得最勁，至2003年跌足七成。沙田駿景園及馬鞍山雅典居，也是97當炒盤。

當年不少炒盤，大部份已返家鄉，惟浪翠園當日的放煙花效應，升勢跑贏大市，升得越急越高，他日跌落來通常理論都是跌得越急越多，可比喻今日瘋狂的樓市。

記者：朱連峰

掌握財經生活資訊，即Like「蘋果ATM」fb專頁啦！
http://fb.com/appledailyatm