蘋果日前已發佈三款新手機iPhone 8、iPhone 8 Plus以及iPhone X，當中iPhone X就自然受到各方關注，事關iPhone X擁有新功能Face ID，以3D臉部識辨系統Face ID取代指紋解鎖嘅Touch ID。

不過唔少網民對於Face ID功能都持觀望態度，事關連蘋果高層示範呢個新功能都唔成功，之後再試先成功解鎖，但蘋果就強調呢個功能好厲害，即使孖生兄弟都會分得到，好犀利咁。

至於Face ID係唔係真係咁勁，真係要等到iPhone X 11月有真機喺手先知，不過網民就特別擔心Face ID呢個功能會對唔少韓國人失靈，事關韓國整容風氣盛行，唔少韓國人離奇撞樣，好似去年韓國小姐選舉，33位佳麗個樣都差唔多，唔少網民話根本傻傻分不清邊個打邊個。又好似唔少演藝圈嘅藝人都好似樣，當中好似朴信惠同T-ara前成員花英、俞承豪同蘇志燮、Rain同2PM嘅俊昊、朴素丹同金高恩、允兒同Krystal、金裕貞同泫雅、鄭采妍同秀智、李鍾碩同NaNa等，所以大家都話只要Face ID呢個功能能夠順利喺韓國使用，咁其他國家就唔擔心用唔到咁話。