美國名媛ParisHilton既妹妹NickyHilton尋晚同弟弟BarronHilton齊齊現身香港出席活動，喺活動見到著住黑色連身裙兼4吋高踭鞋既NickyHilton肚凸凸，大家梗係恭喜吓佢喇，佢話：「我有咗6個月BB，諗住想有驚喜，所以唔會檢查性別，我覺得有BB係一件開心事，囡囡定囝囝都冇所謂。」講到準備功夫？佢話o依家準備緊一間BB房，中性設計為主，仲話男仔女仔名都諗咗啲。

之不過大住肚仲坐飛機周圍走，會唔會覺得好危險？Nicky話：「我仲會飛多一段時間，直到去到紐約嗰站為止，之後會留低生B，今次係我最後一次長途機，我好好彩，陀B感覺好好，感覺好有活力。」JustinBieber嘅緋聞女友HaileyBaldwin亦有現身，但係冇接受傳媒訪問。

啱啱同倪妮公開戀情既井柏然，佢都有現身活動，不過今次淨係同經理人出席，女友冇同行，問到佢喺公開戀情之前有冇共識，佢話：「這次是狗仔隊給我們的驚喜，我們剛剛拍拖沒多久，本來未有想過要公開，謝謝大家的祝福。」但未有回應係咪同居。

鄭秀文亦有出席活動，經常潮人打扮嘅Sammi，聽到大家提議佢做潮流教主，佢話：「我唔敢當，雖然我都有著流行嘅潮流嘢，但係我覺得最緊要有自己風格，我都希望人哋讚我有SammiStyle。」整咗個長髮look既Sammi，俾人問到佢老公鍾意佢長髮抑或短髮look？佢話：「佢兩樣都冇所謂，不過我諗個個男人唔鍾意女仔剷青，佢都會制止我，所以我會收歛吓。」Sammi話希望最後一站巡迴演出會喺香港，所以會入紙去紅館申請：「我希望喺夏天開騷，咁熱可以露多啲！」