【賢仔Call馬】新勝充滿說服力！「清風」送爽再下一城（廖浩賢）
蘋果日報 2019/11/05 21:40
姚本輝再下一城廖浩賢正陽清風賢仔call馬
正陽清風（近）新勝猶勇
今次（6日）谷草夜馬跑九場，留意頭場開跑時間為6時45分，馬迷朋友切記留意。
騎師方面，雷神跑完墨爾本盃後匆匆回港，可取係今次賽事跑夜馬，相信佢體力唔會受太大影響。
練馬師方面，姚本輝目前排在龍虎榜第二位，勝出率則屬同儕之冠，麾下第八場「正陽清風」越跑越進步，有力再下一城。
第八場三班1000米：「正陽清風」上仗贏馬姿態充滿說服力，好少見谷草短直路1000米可以後來居上，輕鬆將「衝亞」趕過，保守估計仍有兩場頭馬在手。
距離上仗六個星期，有足夠時間回氣，10月中安排試直路草閘，無戴眼罩起步應聲彈出，中段稍留跟馬尾，拉士300米移出望空，即換左腳逢馬過馬直奔終點，姿態譽滿欄邊。
呢課閘有兩個重點值得一提，雖然前胸有白汗，但閘前情緒穩定，中段可以拖後跟馬走，證明口勁收斂，鞍上人可以隨意指揮，此乃大熟大勇之表現。
日前馬會公布此駒體重增加33磅，食得又操得，找不到任何挑剔地方。
「衝亞」今仗換潘頓無疑戰鬥力提升，賽前試閘彈甩「旺蝦王」及「翩翩」三個身位，體重增加廿磅，呢條翻版Q都頗為穩陣。