全國政協副主席兼愛國元老霍英東個乖孫霍啟中，被警察發現凌晨喺沙宣道游游下，上前截查，當場搜出懷疑係大麻東西。呢位警察叔叔可謂有眼不識泰山，竟將霍少爺生擒返署，要佢簽保一千元！
霍英東啲孫近來趣聞多多，已有霍啟山與大陸豔星章子怡午夜火熱豔照曝光，𠵱家又整鑊霍啟中涉嫌藏毒案，真係位位都咁有性格，可惜碰正個唔生性嘅警伯。
不過唔怕。霍啟中被擒，經驗明正身，都未必有難。事關律政司嗰邊，有愛國嘅梁愛詩把關。詩姑連胡仙都放生，呢個一來係霍英東個孫，二來就算查明真係藏大麻都濕濕碎，況且後生仔初犯，冇理由唔放人家一條生路，以示鼓勵人改過自新，真係董家飯平呀？