FC悉尼繼續頹勢，周六澳職鬥榜下游嘅布里斯班獅吼，開波18分鐘就已經失兩球，最終以1:2輸波，連同亞冠四場不勝之餘，常規賽冠軍亦都要hold住先。

開波僅僅9分鐘，獅吼中場麥特麥基接應左路角球，前柱頂入先開紀錄。九分鐘後，悉尼再輸死球，積及柏巴接應隊友異傳，禁區內無人看管下輕鬆射成2:0。輸到兩球嘅悉尼終於醒，34分鐘後防阿歷斯韋堅遜接應罰球頂入，但球證翻睇VAR下，發現韋堅遜越位在先入球被推翻。雖然最後有連高域追成1:2，但都係難逃輸波命運，成功開出6.3倍嘅客勝。

而隨住第二位嘅紐卡素噴射機今日1:0贏咗鳳凰，悉尼喺榜首嘅領先優勢縮窄到得返五分，仲有四場聯賽，常規賽冠軍都唔係話袋硬。

--------------------
永不獨行！利物浦 FC 當季球星降臨《BFB》！立即帶領紅軍，創造新輝煌！ http://bit.ly/2oQObi1