今集直播玄學節目《玲機一動》，麥玲玲就請咗同佢一齊拍《宮心計2深宮計》嘅周秀娜做嘉賓。娜姐喺劇中飾演太平公主（陳煒飾）外甥女鄭純熙，被安排入宮做李隆基（馬浚偉飾）嘅妃嬪，出場冇耐就有床戲，要露膊兼晒腿。玲玲笑馬浚偉「演員福利相當唔錯」，娜姐話﹕「真係相當唔錯呀！唐朝服裝係比較性感，既然定欣同馬仔都有(床戲)，冇理由我冇啦，我咁愛佢。」

戲份咁重，但就冇份宣傳，原因係娜姐簽咗蕭定一公司同無綫有官司在身，呢啲又算唔算出師不利？娜姐話﹕「戲份我諗就好難cut，我同每個對手都有感情關係，馬明同蕭正楠查案，有案件我係牽涉在內，好難刪減，除非剩出我背脊啦！但只係覺得第一次拍劇，合作愉快，好對佢哋唔住，佢哋做晒宣傳，做埋我嗰份。」

玲玲師傅話娜姐本身旺名氣運，但名氣星同是非星係「同等」，睇吓變吉星定凶星。面相嚟講，牙齒唔靚最大忌，佢話﹕「如果得一筆錢，就要整咗牙齒先，唔係成日同人嗌交。牙同嘴靚，相對是非較少。」

原來娜姐細個門牙係向內生，都曾經有箍牙，不過現在牙齒整齊番，嘴形又覺靚，所以向來是非都唔多。反而擔心自己幾時嫁？娜姐順勢向玲玲師傅請教姻緣，玲玲話見腮骨使唔到男人錢，娜姐個樣勁失望.......惟有靠自己。

《玲機一動》
日期：6月18日（周一）
時間：晚上十時

fb live：　　 https://www.facebook.com/appledailyent/
YouTube live：　 https://youtu.be/IcxYxbnbAys

《娛果》Facebook 專頁
http://fb.com/appledailyent