政府啱啱公佈咗九龍西補選喺11.25舉行，民主派嘅代表呼之欲出，劉小麗唔得就李卓人替補上陣。建制派呢？至今竟然仲未定人選，盛傳食衞局前局長高永文係首選，若然佢唔肯，就由經民聯深水埗區議員梁文廣（Scott）上陣。雖然梁文廣知名度唔算高，但後台都算強，現為西九新動力成員，而建制九西阿姐之一嘅梁美芬，仲係佢紅娘嚟㗎喎。

84年出生嘅Scott，同九西都幾有淵源，細個住喺旺角嘅板間房，經常同細妹去界限街公園玩，幼稚園則喺而家嘅始創中心對面，最記得區內有間鋪頭嘅椰子汁好鬼得。由於勁貪玩，喺聖芳濟書院讀書時都參加唔少課外活動，最鍾意去附近嘅球場踢波，成績呢...真係唔多好，初中仲試過留班，「我媽媽好嚴，知道我要留班，罰我要嘁階磗罰企，我咁活躍但係唔准郁，好辛苦㗎」。

唔經歷挫折未必會成長，Scott知衰後開始發奮圖強，放學後一定會溫書，盡力喺差嘅科目追落後，仲攞過當時有團體舉辦嘅油尖旺最佳進步獎，高中就去咗天主教新民書院，先後喺浸大完成中國商業副學士課程同公開大學獲中國商業工商管理學士學位。佢話自細冇乜志願，但對時事及社會事務都感興趣，大專時參加過國事學會同學生會，03年嗰屆區議會選舉，佢喺民協做實習，幫過當時嘅民協油尖旺區議員許德亮，自此同政治結下不解緣，畢業後想做議員助理，send過唔少cv畀區議員，最終竟然係深水埗前區議會主席、委任議員陳東請咗佢。

獲得區內德高望重嘅東叔賞識，仕途果然唔同啲，佢憶述當年獲支持喺富昌邨開拓地區服務，2011年區選一擊即中贏埋民協對手，而當時備戰2012年立會嘅梁美芬想搵後生仔排佢條隊，Scott點頭後入埋西九新動力排喺名單第四位，估唔到事隔6年就有機會擔大旗。Scott大讚梁美芬好nice，同後生仔打成一片，而佢識到太太亦要多得梁美芬，「我太太係芬姐當時嘅統籌主任，嗰時我成日趁lunch time搭巴士去搵佢撐枱腳，所以芬姐係我紅娘。」