狼振英下月端午節前夕會去美國訪問幾日，主要出席貿易發展局喺美國嘅招商論壇同晚宴。狼英喺香港「一路向西」，事事問過西環再order中環，但美國之行卻拒絕「向西」，只留守東岸紐約幫香港招財；寥寥幾日，行程匆匆，唔通驚特首之位遭人突襲？

下月中，香港會喺美國有多場roadshow。先由貿發局喺美國東、西岸舉行大型峯會招商，之後旅遊發展局亦會喺美國西岸推介香港吸客，旅發局主席林建岳會做主帥，仲搵咗成龍幫手推銷香港。
但呢段時間訪美嘅狼振英，卻只去紐約唔去西岸，重頭戲係出席下月11號嘅「邁向亞洲，首選香港」高峯論壇及晚宴。據知狼振英此行主力招商、政治為次，但喺紐約期間亦會拜訪政商界人士，亦有機會同紐約市長彭博會面。
查實貿發局呢個特區訪美團都幾大堆頭，有逾百名官員同商界代表隨行，包括利豐馮國綸、嘉柏環球詹康信、溢達集團楊敏德，以及前總理朱鎔基長子、中國國際金融有限公司總裁朱雲來。「頭號梁粉」、恆隆集團主席陳啟宗隨團去晒東、西岸，做足四場研討會主持。

mailto:[email protected]