噚日有報道爆袁嘉敏聲稱被Dominic(何浩文)同Jeana(何佩瑜)玩杯葛，覺得好迷惘，又指成套戲剝得最多，但自己只係《鴨王》嘅「陪襯品」，認為王晶係一心想捧Dominic(何浩文)，批評同戲嘅Dominc同Jeana不時針對佢，袁嘉敏覺得好大壓力，袁嘉敏都知佢哋喺朋友，又係簽俾同一間公司，唔明點解只係同Jeana拍一日半嘅戲份，人哋都會唔妥自己。

今日凌晨《鴨王》喺中環舉行電影祝捷會，賀票房衝破4百萬，話晒袁嘉敏係套戲去得咁盡，脫得最多，點都算係「女功臣」，不過袁嘉敏都冇現身，唔知係唔係同監製話永不錄用袁嘉敏有關，男主角Dominic回答：「嘩!私人恩怨呢啲嘢，我就唔知，總之我哋同監製就冇問題，其他嘢就理唔到咁多。」

有傳袁嘉敏爆王晶開呢套戲係為咗力捧Dominic，袁嘉敏脫得最多，只係做「陪襯」，Dominic解釋：「王晶好願意捧新人，我係新人嚟。」Jeana插嘴：「王晶好欣賞Dominic，同佢哋講其實係呢套戲俾佢擔正，係希望多啲人可以認識佢，畀佢一個進步。」

問起知唔知點解袁嘉敏唔到，演員何華超又忽然認頭表示：「係我衰，係我唔記得咗叫佢。」Dominic指見公司嘅invitation，有袁嘉敏個名，有邀請過袁嘉敏，Dominic續言：「電影公司好似話佢好忙，咁佢多嘢做，咪唔嚟囉!我哋冇咩工作，咪自己嚟囉!」唔知係唔係因為對方工作撞咗期。