姜文杰(Benji)今日喺中環出席好友王宗堯續約儀式，Benji表示最近洽談一個內地工作，卻遇上騙案，佢話：「我同另一個台灣藝人傾咗要上一個內地綜藝節目，有個『劉小姐』同我哋聯絡，佢好專業咁口吻，傾到最尾，佢攞晒合同我哋簽名，之後無啦啦失蹤，失蹤一個禮拜之後，佢SMS我話係劉小姐嘅助手，話佢喺內地拍嘢一死七傷，有單爆炸案，我哋聽完好緊張，會唔會有事呀，但之後有個奇怪現象，我發現劉小姐嘅instagram頭像，原來係一個台灣模特兒嘅相，又話佢哥哥係五月天嘅阿信。」

睇番以上種種疑點，Benji就同經理人傾番呢件事，証實咗呢個劉小姐係假冒，Benji話：「我哋擔心如果對方係一個瘋狂fans想見我哋嘅話，其實都係小事，但佢有晒我哋私人資料，銀行轉帳戶口號碼，我哋怕佢會唔會有下一步行動，呢一刻我哋冇任何嘅損失，只係一個欺騙，所以內地公安唔會受理。」

Benji指呢位「劉小姐」instagram有follow汪東城同洪天明，佢話：「我有聯絡過天明，可能佢老婆最近生咗BB，所以佢未覆我。」Benji指曾致電查詢內地電視台，根本冇呢個綜藝節目，所以Benji希望行內人要小心。

另外，同場張松枝都有撐王宗堯，佢喺新戲演一名高級懲教職員，講到現時工作，松枝表示有啲電影傾緊。講到港視司法覆核獲勝訴，佢話有留意：「贏咗但覺得機會唔大，唔係咁睇好，我仲有三部港視劇未播。」講到港視同亞視傾唔掂？佢話：「一定傾唔掂啦，亞視點樣攞一千萬出嚟出糧？就算補貼五百萬，亞視都要畀錢，冇可能傾得成。如果王生（王維基）攞千五萬出嚟，我諗已經點咗頭。」